文: 柴笛該也
獻給我愛嘅每套韓劇、每個綜藝、每部電影; 用港式廣東話口語，與你分享點滴。
8月喺韓國將會上映已故演員李善均最後一部從未公映嘅遺作《幸福的國家》(행복의 나라 Land of Happiness，2024)，作品嘅背景圍繞時任韓國獨裁總統朴正熙遇刺案，與《南山的部長們》(2020) 嘅plot同期，發行商係NEW(《屍殺列車》、《7號房的禮物》); 而上個月7月12號，發行商 CJ ENM「終於」將其另一部遺作《Project Silence》(《寂噤計畫》 탈출: 프로젝트 사일런스)展現國民眼前;用「終於」係因為套戲其實已於去年喺法國最尊貴嘅康城電影節(第76屆(2023年5月))作 world premiere，唯未及喺韓國上畫、10月就爆出李善均懷疑涉毒案，片商持審慎態度下、終於喺5月公告此舉，讓電影喺韓國重見天日; 睇吓第二時有冇緣寫吓佢哋。今次介紹嘅，則係喺《港ED時報》第57期、寫第48屆TIFF提過嘅《Sleep》(잠 台譯《鬼夢遊》/港譯 《枕邊怪嚇》 ，2023) 。
演技被 critics 形容為名不虛傳嘅李善均、憑《Sleep》+《Project Silence》舊年兩踏康城紅地氈，事業如日方中，與《Sleep》入面嘅男一角色、同為演員嘅吳賢秀(李善均 飾) 大相逕庭。吳賢秀嘅演藝生涯沉寂多年，卻得新婚兼有咗BB嘅鄭秀珍(鄭裕美 飾) 義無反顧咁支持。直到阿囡出世，秀珍卻發現賢秀有夢遊，行為擾人不已，嚴重程度每況愈下 😱…
近期多咗影視 feature 現代韓國傳統民俗信仰，例如: Netflix嘅《黑暗榮耀》、SBS嘅《惡鬼》、本年度驚慄爆表嘅《破墓》等; 前者輕輕帶過，後兩者則係擺明車馬、主角們與巫族信仰關係密切，《Sleep》都揉合呢個神秘、靈異嘅原素; 喺 Jason Yu 柳在善 (有譯:柳在宣) 自編自導嘅故事人設，係三小口、加隻狗，完全係鄰家小家庭feel，柳導演仲畫埋啲咁cutey嘅posters。
…心諗，可以有幾心寒、可以有幾恐怖呀… little did I know that 攜《寄生上流》闖第92屆Oscars 令韓國電影再次走向世界、以黑色幽默聞名於世嘅奉俊昊導演用「近呢10年來睇過嘅電影中最獨特嘅恐怖」嚟形容呢部作品。話說，當初「做緊𡃁」嘅 Jason、將自己平素寫埋寫埋嘅 scenarios 俾奉導過目時，奉導鼓勵佢以此構思作為出道電影; 夢想成真好感動，好一對伯樂與千里馬!
從上面電影海報最頂嘅位置可以知道，《Sleep》除咗被法國康城電影節邀請(作全球首映)，喺多個大型國際電影節都有參展，如加拿大TIFF多倫多國際電影節(北美premiere) 、西班牙SITGES 錫切斯電影節 and 美國 Fantastic Fest 奇幻電影節。大放「異」彩嘅《Sleep》票房唔差，柳在善摘得新人導演、劇本獎，鄭裕美獲封青龍影后; 柳、鄭兩位異口同聲話李善均嘅表現、feedback、引導同貢獻皆功不可沒。
靜靜雞話你知，其實套戲係去過個叫香港夏日國際電影節嘅 event。不過咁靜雞雞嘅 event，你知吓咪算囉。話時話，第49屆TIFF即將喺9月開鑼啦，又係時候八掛吓今年有乜韓片嚕! First up，global premiere 會有禹民鎬導演（《南山的部長們》）嘅《哈爾濱》，cast 嚟玄彬、朴正民、趙宇鎮、全汝彬、劉宰明、朴勳，仲有鄭雨盛 、李棟旭加持🤩; 齋睇陣容，唔駛占個卜、問過巫師，你都測到佢係攞獎格囉可? 喺8月19日前成為 TIFF member，可以名正言順、佗佗佻佻、輕輕鬆鬆比 non-member 更早預購 TIFF tickets; 唔駛好似方力申泳會嘅9歲小泳手，明明泳速達標，卻係都要嚟幾場大龍鳳，先可以獲泳總批准、參加本地錦標賽。
See you next time👋！
Comments