文︰ 柴笛該也 | 圖︰cap自呢條片
獻給我愛嘅每套韓劇、每個綜藝、每部電影；用港式廣東話口語，與你分享點滴。
上期講咗《第43屆青龍電影獎》嘅部分獎項，今期嚟個wrap up，順便補返一段：其實青龍電影獎嘅主辦單位 Sports Chosun喺舊年2022年中，整咗壇青龍Series Awards，包攬喺電視台(免費+收費) 上演同OTT streaming media (Netflix，TVING，WAVVE， Disney+， KakaoTV，Apple TV，Coupang Play，Watcha等) 上架嘅韓資原創韓劇同韓綜表揚一番。唔知係咪見百想有兩瓣 (movie/drama) 做得幾好，自己加辣、搞個「新兩瓣」(drama+variety show)；《第1屆青龍系列大獎》(喺《港ED時報》第34期提過) 已經好有睇頭，有55部劇集及49部綜藝入圍參選，競爭激烈，氣氛熾熱。常言道：百貨應百客，做大啲個餅，觀眾有多啲選擇，係好事嚟；有得揀，先至係老闆。表揚嘅嘢，I guess the more, the merrier🙌！
Anyways, back to《第43屆青龍電影獎》：其他獲獎作品 (與獎項)，計有《Hunt》 (最佳新人導演獎/最佳剪輯獎/最佳攝影燈光獎) (港譯：《獵戰》)、《犯罪都市2》(觀眾票選最受歡迎電影獎/最佳技術獎) (港譯：《犯罪都市：極拳執法》)、《Kingmaker》(最佳美術獎) (港譯：《影子造王者》)、以及《在凌晨两點點燃》(最佳短篇電影獎)。
憑《Hunt》榮獲最佳新人導演獎嘅李政宰，因開工而未能赴會，獎座由好友鄭雨盛代領。
鄭雨盛興之所至，喺台上問觀眾，即場打long D向李政宰報喜問好唔好…有啲人O嘴，咁激？但有花生食梗好㗎😂。大會司儀柳演錫見狀 (live喎，CHing！)就問鄭雨盛: 「(李政宰前輩)如今身在何方? 」鄭答: 「喺英國、拍緊嘢…唔知佢聽唔聽㗎。」另一MC金憓秀再問︰「時差如何？」 鄭雨盛loading中😅無答 (柴笛該也按︰時差9粒鐘)。MC們可能pre-amp緊啲觀眾個call-out可能不似預期😂。Speaker phone接通後，鄭雨盛向李政宰問安，換嚟李政宰話︰「我聽得清楚呀」Obviously聽得唔清楚啦，倒控哄得滿堂大笑；李政宰語氣平淡，事前可能真係冇夾過咁款；鄭雨盛神情開始緊張，把聲震震吓話︰「我宜家喺青龍獎……我攞咗獎」，被反問係咪攞咗最佳男主角 (鄭雨盛有份提名)，場面搞笑！ 唔知道被「擺上枱(台)」嘅李政宰繼續friend tone (佢哋太熟絡啦，熟到被人笑似「青潭(洞)夫婦」)，柴笛該也開始戥鄭雨盛冒汗，怕鄭雨盛此舉係「好心做壞事」…鄭雨盛答「係攞咗最佳新人導演獎」兼恭喜佢，先話「我開咗speaker phone」；李政宰當堂靜晒，唔知係咪爆緊粗😂！金憓秀可能都feel到氣氛有啲尷尬，好機靈咁話李政宰有啲驚訝，叫觀眾大大力拍掌 🎉；李政宰話語中仍然有啲不知就裡…被金憓秀提醒，鄭雨盛再講︰「我『代你』攞緊獎…你咪拍戲住，快啲講感想」。終於get到個picture嘅李政宰，跟住連續講咗三個 thank you, formal tone返、積極道謝，最後順利收線(收科)；單拖赴會嘅鄭雨盛放閃奏效，同missing half 李政宰成功製造美好回憶，兩個青龍獎常客果然 never disappoint！
頒獎禮當晚有4組嘉賓表演助慶，keep the guests and viewers entertained 嘛！光速上位嘅女團Ive / NewJeans 同出道十年嘅rapper Zico perform時，台下一眾表現超high，氣氛熾熱🎉。其中一位攝影師更捕獲彩蛋，而段小插曲嘅主角係湯唯！話說舞台上，鄭熏姬同classically-trained 嘅La Poem唱緊《分手的決心》嘅主題曲《迷霧》(안개) (隻歌本來係鄭熏姬70年代嘅出道作)，由於唱功了得，歌聲令在場人士如痴如醉；去到隻歌嘅chorus，鏡頭忽然一轉，驟見湯唯零零舍舍姿態奇特，俯首折腰，上身唔貼椅背，鏡頭後嘅觀眾，齋睇到佢左邊45°頭殼頂，及至湯唯坐返直個身，先見到佢正以紙巾印乾眼淚，眉頭略皺，原來湯唯喊咗出嚟😲。身邊嘅朴海日顯得些微不知所措，但係影帝級嘅佢keep住微笑，投以理解目光，及後數度輕拍湯唯膊頭慰問安撫，唔知有無叫佢「你好快啲收聲喇、唔係就又傳同你金導演婚變㗎啦，啲小粉紅至眼紅啲活得比佢哋好嘅人，成日希望你哋『散』、又多嘢講㗎啦。」留意到湯唯喊過，喺《迷霧》隻歌表演完後，金憓秀表示「海俊同瑞萊」(《分》中男、女主角) 彷彿喺青龍獎頒獎禮再遇，好感動。最後湯唯收復情緒，(好在冇喊花塊面，) 分別用韓、英兼佢母語deliver咗佢首個青龍電影獎女主角thank-you speech。假如湯唯父母能被放行出國，佢番致謝辭，應該會更精彩。
十一年前，金泰勇導演勇敢地以《晚秋》，將遭「無愧為偉大光榮正確的」共產黨不知所謂地封殺嘅湯唯，帶進韓國電影市場 (湯唯憑《晚秋》首度提名青龍電影獎女主角，該片喺大陸嘅高票房亦成功讓伊人得以解封🤑)。十一年後，朴贊郁導演藉《分手的決心》，讓「女主角非佢莫屬」嘅湯唯深深打入韓國戲迷心坎，要知道韓國netizens將青龍獎女主角一票，投咗畀湯唯😎。所以柴笛該也都係咁話: 「魚唔過塘唔肥」 + 「此地不留人 自有留人處」+ 「whatever doesn’t kill you makes you stronger」+ 「專心做好自己嘢」，特別係飄洋過海嘅你︰加油！
入圍提名已經係肯定，獲頒獎項更係錦上添花。柴笛該也謹此祝賀有份角逐《第43屆青龍電影獎》嘅一眾影業職人。「期待ing」今年6月上畫嘅《犯罪都市3》(《犯4》已經開拍，公映檔期為2024) 同年底嘅《露梁：死亡之海》(《閑山：龍的出現》嘅後傳，不過係唔同cast) and many others🤩。
下期開始轉離「韓綜」跑道，搵啲韓國電影嚟同大家吹吓水。See you next time👋！
Comments