圖 / 文：Neko
連續幾期都去咗西式餐廳，你就知Neko 🐱 的確好鍾意食brunch 飲咖啡。^.^" 不過間中會去吓啲唔同類型嘅餐廳，依家嘅天氣凍凍地，最啱去食碗熱辣辣嘅麵啦。最近試咗間越南餐廳，整體而言覺得唔錯。
服務員服務態度好好，好醒目，落單完全唔洗寫低，效率好高。前後去過兩次，兩次都係最忙嘅時間，但係冇令Neko 失望。👍 細心留意，周圍都坐滿後生仔女，簡直係佢哋嘅食堂。可能係因為價錢，份量同餐廳設計有關。
成間餐廳都佈置到好新潮、充斥住越南風，一邊牆佈滿咗草帽同一大塊黑板，寫咗好多人挑戰大碗越南粉嘅記錄。不得不提，個menu 好有心思，整到成本雜誌咁，頭頭仲以為去錯地方，做咩嘢俾咗本雜誌嚟。Menu 唔止係menu，仲有介紹越南文化。
Menu 內嘅選擇都幾多款，有套餐，有散叫、又有小食。如果好似Neko咁為食，又想食飯又想食河粉，Double-Doubowl 係不錯嘅選擇。價錢同一碗正常越南粉唔差太遠，份量感覺上一啲都唔孤寒。Neko 亦好鍾意食Saigon Tofu。每次去都必叫，仲記得有次隔離枱望住碟Tofu 話︰「好似好正咁喎！」仲話因為聽到Neko 同佢老公講廣東話先敢出聲咋。 依加諗返起都好有親切感。🥰
Miss Saigon Vietnamese Noodle House
+1 780-249-2220
Yorumlar